Нийслэлийн Засаг дарга бөгөөд Улаанбаатар хотын захирагч Г.Мөнхбаяр захирамж гаргаж Сонгинохайрхан дүүргийн Засаг даргаар Цэгмидийн Болдыг томиллоо.

  Нийслэлийн нутгийн захиргааны байгууллагын удирдах ажилтны шуурхай зөвлөлгөөн болж, түрүүчийн шуурхайгаас өгсөн үүрэг даалгаварын биелэлтийн талаар мэдээлэл сонсож, цаг үеийн зарим асуудлаар ярилцлаа. Нийслэлийн удирдах ажилтнуудын түрүүчийн шуурхай зөвлөлгөөнөөс “Шар усны үерийн аюулаас урьдчилан сэргийлэх арга хэмжээг эрчимжүүлэх тухай” Нийслэлийн Засаг даргын албан даалгаварыг хэрэгжүүлэхийг холбогдох газруудад үүрэг болгосон.

Нийслэлийн Засаг дарга бөгөөд Улаанбаатар хотын Захирагч Г.Мөнхбаяр захирамж гаргаж Чулууны Сайханбаярыг Сонгинохайрхан дүүргийн Засаг даргын үүрэгт ажлаас чөлөөллөө.Ч.Сайханбаяр үүрэгт ажлаасаа чөлөөлөгдөх тухай хүсэлт гаргаж хотын мээрт өргөдөл ирүүлснийг үндэслэн  шийдвэрийг гаргалаа.

Нийслэлийн Засаг даргын Тамгын газар, АДРА Монгол Олон улсын байгууллагатай “Тамхины эсрэг эрүүл мэндийн боловсрол” төслийн хүрээнд хамтран ажиллахаар боллоо. Энэ тухай гэрээнд Нийслэлийн Засаг даргын орлогч Ц.Цогзолмаа, АДРА олон улсын байгууллагын Монгол дахь суурин төлөөлөгч Крис Женсэн нар өнөөдөр гарын үсэг зурсан байна.

Баянзүрх дүүргийн удирдлагууд энэ ондоо багтааж дүүргийн төр, захиргааны нэгдсэн байртай болохоор төлөвлөж, ажилдаа ороод байна. Одоогийн Засаг даргын Тамгын газрын эзэмшиж байгаа барилга нь 1950 онд ашиглалтад орсон ба 1990 оноос хойш их засвар хийгдэж байгаагүйгээс барилгын таазны болон давхар дундын даацын хучилтын модон хийцүүд нь муудаж, сантехникийн цэвэр ус, дулаан хангамжийн шугам сүлжээ нь зэвэрчээ.

Баянгол, Баянзүрх дүүргийн нутаг дэвсгэрт эрүүлжүүлэх байр барих асуудлыг Зөвлөлийн хурлаар хэлэлцээд дэмжлээ. Нийслэлийн Цагдаагийн газрын гаргасан мэдээгээр нийслэлийн хэмжээнд өдөрт дунджаар 196 хүн эрүүлжүүлэгдэж байгаа бөгөөд тогтоосон стандартын дагуу эрүүлжүүлэх байруудын талбайн нийт хэмжээнд харьцуулж үзэхэд хоногт 47-50 хүнийг илүү буюу багтаамж хэтрүүлэн эрүүлжүүлж байгаа ажээ.

Сүүлийн үед Нийслэлийн нутаг дэвсгэрт зөвшөөрөлтэй, зөвшөөрөлгүй олон тооны хөшөө энд тэнд босгох болсон. Энэ асуудлыг зохицуулсан журам ч байдаггүй. Хадгалалт, хамгаалалт муу, хариуцах эзэн тодорхой бус байдгаас үүдэн хөл нь хугархай морьтой эр, өрөөсөн гар нь салаад унасан хүний хөшөө цөөнгүй тааралдана. Иймээс хөшөө, дурсгал хүндэтгэлийн самбартай холбоотой асуудлыг цэгцлэх үүднээс Улаанбаатар хотын Барилга, хот байгуулалт, төлөвлөлтийн газраас “Улсын нийслэлд хөшөө, дурсгал хүндэтгэлийн самбар байрлуулах журам”-ыг боловсруулаад байна.

НИТХ-ын Тэргүүлэгчдийн хуралдаанаас нийслэлийн хэмжээнд хөдөлмөрийн зах зээлийн харилцааны талаар хийсэн суурь судалгаан  дээр үндэслэн  хүн амын ажилгүйдэл ядуурлыг бууруулах, хөдөлмөрийн зах зээлийн харилцааг боловсронгуй болгох хөтөлбөр болосруулахыг үүрэг болгосон. Энэ дагуу Нийслэлийн Хөдөлмөрийн газар “Хөдөлмөр эрхлэлтийг дэмжих нийслэлийн хөтөлбөр” боловсруулсан байна.