Хятадад утаанаас болж нислэгүүд саатжээ

2013-01-30 00:00:00

            Хятадад сүүлийн үед агаарын бохирдол дээд хэмжээнд хүрч, баагирсан өтгөн хар утааны улмаас үзэгдэх орчин хязгаарлагдмал болсон тул өчигдөр Хятадад олон тооны нислэгийг цуцалжээ. “Синьхуа” агентлагийн мэдээлснээр утааны улмаас нийслэл Бээжин хотод 33, Женжоу хотод 100, Чиндаод 20, Жинаньд 13 нислэгийг тус тус цуцалсан байна.  Хятадын үндэсний том баяр болох Цагаан сар удахгүй болох гэж буйтай холбоотойгоор хот, хөдөөг зорих иргэдийн урсгал эрс нэмэгдсэн энэ үед олон тооны нислэг цуцлагдсанд зорчигчид нэлээд бухимдалтай байгаа гэнэ. Хятадын зүүн бүсийн хотуудад утааны улмаас үзэгдэх орчин 100 метрээс дотогш хумигдаад байгаа бөгөөд Засгийн газраас иргэдийг аль болох гадагш гарахгүй байхыг анхааруулсан байна.

Эх сурвалж: News.mn