Автобус, троллейбусны үйлчилгээнд тавих хяналтыг эрчимжүүлэн ажиллаж байна

2019-04-05 12:41:26

Нийслэлийн Засаг даргын 2019 оны 04 дүгээр сарын 03-ны өдрийн 01 дүгээр, Улаанбаатар хотын ерөнхий менежерийн 2019 оны 03 дугаар сарын 26-ны өдрийн 02 дугаар албан даалгавруудыг хэрэгжүүлэх ажлын хүрээнд нийслэлийн Нийтийн тээврийн үйлчилгээний газраас удирдамж гарган нийтийн тээврийн үйлчилгээнд явж буй автобусны гадна, дотор цэвэрлэгээ, үйлчилгээг тогтмол чанартай гүйцэтгэсэн, техникийн засвар үйлчилгээг тогтоосон норм, нормативын хүрээнд хугацаанд нь хийж, иргэдийн аюулгүй, тав тухтай зорчих нөхцөл бүрдүүлсэн байдалд тавих хяналтыг эрчимжүүлэн ажиллаж байна.

Удирдамжийн дагуу Энхтайваны өргөн чөлөөний дагуух автобусны зогсоолуудад болон бусад дүүргүүдийн нутаг, дэвсгэрт хөдөлгөөнт шугам замын хяналт, шалгалтыг тус газрын Автотээврийн хяналтын улсын байцаагч, Сити баз консалтинг ХХК, Зорчигч тээвэр гурав ОНӨААТҮГ, Зорчигч тээврийн нэгтгэл ОНӨААТҮГ-ын шалгагч нар хамтран гүйцэтгэж байна.

Дээрх албан даалгавруудыг нийтийн тээврийн үйлчилгээ эрхлэгч аж ахуйн нэгж, байгууллагуудад хүргүүлж, үйлчилгээний чанар, соёлыг сайжруулах, иргэд өнгө үзэмжтэй цэвэр цэмцгэр, аюулгүй тээврийн хэрэгслээр үйлчилгээ авах нөхцөлийг бүрдүүлж, нийтийн тээврийн хэрэгслийн гадна, дотор цэвэрлэгээг тогтмол хийх, нийтийн тээврийн үйлчилгээний цагийн хуваарийг чанд баримтлан, хаягжилтийг сайжруулан мөрдөж ажиллах үүрэг чиглэл өглөө гэж нийслэлийн Нийтийн тээврийн үйлчилгээний газраас мэдээлэв.